很高興您嚟到粵語鎮
Canto Town 粵語鎮
粵語鎮係一個粵語社群嘅網上公共平台，我哋歡迎身處世界各地嘅粵語人：英國、加拿大、美國、歐洲、澳洲、新西蘭、香港、澳門、馬來西亞、新加坡、越南、泰國、廣東、台灣、中國、月球、火星等地，入嚟瀏覽同參加討論。
源起
全球大約有八千二百萬人使用粵語為母語，佢哋生活喺唔同嘅國家，彼此之間冇太多聯繫，當中以香港人，廣東人，海外華僑為主體。一方面呢個群體有住一個共同嘅文化特徵，就係使用粵語；另一方面，由於近年有大量嘅香港人移民海外，呢個移民群體唔單止覆蓋唔同嘅年齡層同職業，亦帶着大量嘅財富同專業知識。但好可惜，粵語群體喺海外並冇太多聯繫交流嘅網絡，大多數都係各自生活係一個一個嘅小圈子，所以無論喺生活上，工作上，人際網絡上，都會遇到唔少困難同問題。
巨大嘅困難，後面就係巨大嘅需求。有見及此，海外粵語人群，特別係新移民群體，迫切需要一個公共平台，可以交流聯絡生活資訊，擴大人際網絡，解決社交上，工作上嘅困難。
願景
我哋嘅願景係建立一個以世界各地粵語用戶為主嘅網上社群。提供聊天，生活資訊，情緒支援，兼職服務，興趣組隊，網上課程，買賣交易等等嘅功能。同一時間，我哋會強化宣傳粵語嘅身份認同，聯繫世界各地唔同文化背景嘅粵語群體，整合一個國際性嘅大粵語族群，長遠形成一個覆蓋全球嘅粵語文化經濟圈。
整合一個大粵語族群有以下好處：
- 保育，持續發展粵語文化
- 提升粵語群體喺海外國家嘅地位
- 為粵語族群提供互相支援嘅平台
- 為粵語族群提供更加多創業同經濟上嘅機會
- 長遠提升粵語族群喺每個國家嘅平均生活質素
使命
我哋嘅使命係建立一個以網上論壇為基礎嘅開放式網上公共平台。用戶經過註冊認證，認同平台價值觀及平台守則之後，可以喺公共平台上自由瀏覽，發佈訊息，參與討論。用戶經過一定時間嘅平台參與使用，可以提升信任等級，信任等級到達一定程度後，可以使用更多平台功能，包括創建群組，組織線上或者線下活動。
呢個公共平台並不屬於個人，而係屬於全體資深用戶，平台嘅主張係每一個用戶都有平等嘅權利同義務，冇一個平台用戶會擁有特權。平台嘅日常運作主要靠資深用戶嘅自治管理，平台亦會招募義工參與一啲特別嘅平台服務。達到最高信任等級嘅用戶，會被邀請加入平台管理層，為平台發展提供意見同作出決策。
Canto Town Values 粵語鎮價值觀：
平等，兼愛，互助